老虎逍遙法外 廉潔形象插水

政治及經濟風險顧問公司發表最新貪污情況調查報告，比較亞洲十六個國家及地區嘅貪污情況，以零分為最佳，以十分為最差，香港得分係二點九五分，排第四位，居於新加坡、日本及澳洲之後。其中公務員貪污、檢控貪污效率及政府打擊貪污決心等方面，評分全線下跌，反映貪腐問題正在急速惡化。

點解本港貪污惡化呢？報告分析，主要係負責打擊貪污嘅廉政公署亦爆出貪腐醜聞，前專員湯顯明被揭發收禮及大花筒宴客等連串貪腐醜行，而前政務司司長許仕仁捲入貪污大案，亦令人關注政府高官與私人財團嘅利益輸送關係。仲有吖，多宗重大貪污案件都拖延數年，令人質疑當局打擊貪污嘅效率。

講到呢度，唔知大家點諗，太一叮就覺得好可悲。香港嘅廉潔與法治曾經係國際典範，依家居然衰喺幾個貪官手上，你都咪話唔令人心噏。冰凍三尺，非一日之寒，連負責肅貪嘅廉署都其身不正，被貪湯搞到烏煙瘴氣，醜聞不絕，廉潔招牌點會唔蒙污蒙羞吖。

正如學者話齋，今次調查只涵蓋至今年三月初，未能反映商人劉鑾雄及羅傑承捲入澳門世紀巨貪案嘅負面影響，否則，排名可能仲低吖。你知啦，佢哋被澳門法庭判處行賄及洗黑錢罪成，分別判囚五年三個月，但居然走法律罅，利用港澳之間冇引渡條例而逍遙法外，咁搞法，本港嘅廉潔形象仲有得剩嘅？

講來講去，都係前特首曾蔭權爵士嘅遺禍。貪曾集團狼狽為奸，大搞官商勾結，利益輸送，廉潔指數有乜可能唔一跌再跌吖。呢，舊年全球反腐組織「透明國際」公布廉潔指數排名，香港又連跌兩級至第十四位，除咗創五年新低，仲被排名第五嘅新加坡愈拋愈遠添。而最奇怪嘅係，貪曾醜聞已被踢爆超過兩年，廉署調查到依家仲係無聲無息，如果話唔係官官相衞，細路仔都唔信喇。

話時話，貪曾曾經被踢爆同「細劉」劉鑾鴻等富商豪遊澳門，而「大劉」嘅案件又喺佢任內轉交澳門，當中究竟有乜嘢蠱惑，真係耐人尋味。家陣廉署及警方再啟動調查「劉羅案」，應該順藤摸瓜調查埋貪曾，話唔定可以揪出更多大老虎，將貪腐集團連根拔起o架！