SUN搞作：少膽虫手記：靠道氣谷銷量
少膽虫今日一返公司，又畀淫賤黎捉入房履行腦腫最大任務──諗計幫幾乎冇人買嘅《爛果》止蝕。
「橋！快啲畀條絕世好橋我！」淫賤黎例牌大嗌，少膽虫亦嚟個公式回應︰「再炒人節流？」點知淫賤黎嗌得仲大聲︰「仲炒？再炒就連我都要落手做嘢喇！」少膽虫即時變招︰「咁不如送贈品谷銷量？」「《爛果》蝕到入晒肉，邊度有錢送贈品？」呢層少膽虫當然已經預計埋︰「聽聞強國有人賣新鮮空氣，仲要每樽賣成十蚊人仔，我哋一於跟風隨報送空氣，咁就低成本又有嘢送喇！」
「死蠢！壹全霉喺正堆填區隔籬，邊有新鮮空氣？」少膽虫獻計兼擦鞋︰「唔緊要，我哋輸地利有人和。腦細你出名呵氣如蘭，有你咪有新鮮空氣囉！」淫賤黎當堂笑晒︰「醒目！見你咁識貨，即刻整啖你歎吓先啦！」
