城中鏡：名人搭機屢現九霄驚魂
呢排嘅城中熱話就係馬航客機離奇失蹤，更觸發名人大談空中奇遇。保良局日前舉行周年慈善餐舞會，講起空中奇遇，副主席陳細潔曾喺頭等機艙遇上懷疑非禮事件，佢話每次坐長途機，例必換上睡衣，食粒安眠藥再戴埋眼罩，便倒頭大睡。
陳細潔（右）同家姐劉陳小寶搭飛機都遇過驚險事。
丁毓珠難忘坐飛機遇上巨大氣流。
霍震寰慨嘆人生無常，搭飛機惟有各安天命。
陳細潔疑遭非禮
點知有次一覺醒來，發現冚喺身上嘅毛氈疑被人郁動過，擺法奇特，腳上毛毛鞋亦不翼而飛，佢心知不妙，馬上向空姐查問，由於無法證實有否陌生人曾走近佢座位，事件最後不了了之。
佢家姐劉陳小寶都遇過九霄驚魂，佢憶述十多年前由澳洲返港，咁蹺香港掛緊十號風球，沿途機身搖晃不定，佢班機降落唔夠四分鐘，就有另一班機出意外，機身着火，佢睇見救護車趕去停機坪救人，驚險到極。講到最常出現嘅氣流，丁毓珠十多年前飛美國探子女時，都遇過巨大氣流，餐具彈上機艙頂，佢惟有扣實安全帶，祈求快啲抵達。
經常搭飛機出外公幹嘅中華總商會榮譽會長霍震寰出席另一場合時亦透露，佢曾喺美國911恐襲事件後應邀到亞美尼亞出席一項武術活動，佢硬着頭皮上機，期間巧遇一位日本高官，對方直言若因飛機意外而仙遊，除咗賠償金豐厚外，都係一種解脫，所以唔怕死喎。佢慨嘆人生無常，乜事都可以發生，惟有各安天命。
