政壇：搞搞政：東華總理限任期 施榮恆綁手綁腳

點解會寫出咁嘅章程綁手綁腳？原來係一名前高官搵佢哋笨。施榮恆話十幾年前一位民政高官主動游說東華三院修改章程，將董事局人數上限設為二十人，總理任期最多連任三屆，即係最多做四年，如果冇得升呢做副主席就要離任。

當年呢位高官話咁做可增加董事局嘅流動性，等有心有力嘅善長有機會加入東華三院大家庭，唔使被同一班人長期霸住個位喎！理由聽落好似好合理，但實情係好心做壞事，皆因董事局總理多數會分管一啲慈善項目，原本跟得好好哋，但中途就要被迫引退，將工作交由新總理接手，確係好勞氣。

爭做副主席奇招百出

咁仲未夠，由於總理升上副主席就唔受四年任期限制，有啲人為咗爭上位而奇招百出，令總理之間關係好微妙，而成功升呢做到副主席後，就可以排隊輪住做主席。

佢對呢啲亂象心水清，所以決定上任後第一件事就係爭取修改章程，將總理任期延長至五年，如果可以爭取到六年就最好喇！係咪可以鬆綁，大家拭目以待嘞。