政壇：肥彭反常封嘴不談普選

尋日約下午四時，身穿藍色恤衫，深灰色西裝嘅肥彭偕太太乘坐黑色私家車到達金鐘一間酒店，適逢呢間酒店今年係二十五周年慶典，特別有一個角落展出過去喺酒店舉行嘅活動相片，聞說其中一張照片同肥彭有關，因此酒店職員第一件事就係帶佢去呢個角落停留一陣，之後先至帶佢上酒店房休息。

肥彭喺等候乘搭升降機上房休息期間，向本報證實會留港四、五日左右，主要係出席牛津舊生會聚會，聲稱不打算喺公開場合演講；至於會否談及香港普選問題，肥彭就拋低一句話：「nothing for universal suffrage（唔講普選）！」

講開牛津舊生會，其實尋晚牛津工商管理碩士一批舊生舉行聚會，但等來等去都唔見肥彭蹤影，莫非肥彭想扮低調，睇準時機先至好似「開籠雀」咁講東講西？究竟肥彭最終係咪「姣婆守唔到寡」講普選，好快就知嘞！