政壇：工程頻超支波波一味賴
政府近年多項大型基建工程都「低開高收」嚴重超支，不時要向立法會追加撥款填氹，令各黨派議員早已唔多滿意。有政壇「元秋」之稱嘅建制派議員蔣麗芸，尋日就喺立法會大會向發展局局長「波波」陳茂波大興問罪，鬧爆政府近年一口氣連推多個工程項目，連私人發展商都開始卻步，嫌「麵粉」太貴唔敢投資，促請政府「打散」工程，為工人提供持續就業機會。不過，波波面對指控冇再賴太太，改為賴市民、賴法律、賴時間。
設計圖片及對白
波波起初例牌解釋，話整個建造業需求殷切，建築成本上升、工人開支又大升，預計立法會餘下會期仲有約四十個工程項目提交財務委員會（財委會）審批，但目前準備向財委會申請追加撥款嘅，只係得蓮塘/香園圍口岸嘅工地平整工程啫！
港台大樓預算飆三倍
不過，商界廖長江隨即踢爆政府工程超支前科纍纍，遠嘅唔講，近嘅已經有西九文化區超支一倍到四百億元，香港電台新大樓嘅預算開支更喺短短幾年勁升三倍，升幅令人咋舌，令市民覺得政府工程超支已經係慣例，要求政府諗計鎖定成本開支、加強效率，避免工程「一闊三大」。
波波就死撐以往工程超支，部分係由於諮詢期期間要照顧市民意見而延誤，又話部分係因為要面對市民提出司法覆核嘅法律挑戰而受阻，港台新大樓就因為「同當初預算有較大距離」喎，最終都要間接承認估錯數。不過，奉勸波波都係唔好再一味姓「賴」，應該認真研究改善方案，唔好次次面懵懵咁向議員攤大手板攞錢。
