百萬富翁創新高 兩極分化嘆奈何
「朱門酒肉臭，路有凍死骨。」杜甫呢兩句詩形容社會不公，貧富懸殊，今時今日嘅香港又點呢？情況亦唔好得去邊嘅咋，呢頭窮人大軍愈來愈多，嗰頭百萬富翁人數打破紀錄，可以話：香港多富翁，窮人褲穿窿。
有銀行調查顯示，本港擁有一百萬元或以上流動資產嘅百萬富翁數目為七十三萬二千人，比上年增加十萬人，增長兩成二，創下新高。每人平均擁有一千二百萬元淨資產，話就話較去年下跌百分之八，但已足以羨煞窮人。調查仲話，富豪人數節節上升，皆因唔少人喺股市同樓市投資獲利喎。
投資市場係富豪遊樂場，無論炒股又好，炒樓又好，贏家永遠都係資本雄厚嘅有錢人，生活捉襟見肘嘅窮等人家得個恨字嘅咋。所以話，香港嘅貧富鴻溝愈拉愈闊，唔係無原因o架，前朝政府嘅政策一味向財團傾斜，不斷催谷金融、樓市，富豪揸鑊鏟就可以發達，窮人隨時只能夠揸兜乞食，喺呢種畸形經濟結構之下，香港點可能唔係貧者愈貧，富者愈富吖。
本來呢，百萬富翁人數增加係好事，問題係，富豪多咗嘅同時，窮人唔止冇減少到，反而不斷增加添，咁就令人笑唔出嘞。大家諗吓，貧富懸殊不斷加劇，階級矛盾日益尖銳，等於為社會埋下計時炸彈，尤其今日不公不義嘅情況愈來愈多，有啲富豪明明被法庭判處行賄罪成，居然可以大搖大擺逍遙法外，基層積累嘅怨氣一旦如火山爆發，後果隨時一發不可收拾o架。
當然，香港問題多多，千瘡百孔，觸發民怨嘅梗係唔止貧富懸殊啦。上述調查反映，百萬富翁對教育及居住環境頗有微言，接近一成人考慮未來五年移民。喂，俗語話有錢使得鬼推磨，本港嘅教育同居住環境差到連有錢人家都頂唔順，草根階層嘅處境係幾咁困難，不言而喻啦。
講開又講，港府無能，市民無奈，基層所面對的困難點止教育同住屋問題，空氣污染、醫療、安老、通脹，幾乎樣樣艱難，樣樣無奈。加上今日社會泛政治化，乜都吵吵鬧鬧，永無寧日，市民連去禮賓府賞花都要被迫睇示威騷，咁搞法，有能力嘅人個個都想移民啦。講來講去，最無奈嘅始終係基層市民，邊度都去唔到，惟有留喺香港坐困愁城，諗起都可悲。
計太一叮話齋，與其富翁多，不如窮人少。好心港府發財立品，庫房水浸就開倉濟民，唔好再做守財奴嘞。當然，最重要都係搞好經濟，令更多人脫貧，咁先至係根本之道吖嘛！
