SUN搞作：打橫嚟講：絕食到有普選為止？真定假呀？

唉！為爭取普選，泛民諸公議員竟又玩「絕食橋」，仲話「絕食行動不設時限」，「直至真普選實現為止」云云，勿說你全部泛民議員得嗰廿丁友，即使餓Q死晒你七百萬人，都唔會有人睇你哋一眼啦！

政治，係「鬥大」嘅！邊個人多有實力，就邊個惡晒囉！只有傻仔才說「政治是妥協藝術」。我係子彈多，使乜同你「平起平坐」呀！玩你就有份！

家陣，上面透過香港代理人日夜吹風，唸咒般話「釋出善意」，真心的邀請你班泛民代表北上「參觀」祖國，甚至可以密斟，實則，挾你班友返嚟做場大龍鳳。嗱！呢啲就係「玩政治」嘞！

人家擺明係逼你哋班泛民上轎嘅，又如何？等你哋去又死，唔去又死，咁咪叫「高」囉！

「做又死，唔做又死」此乃「輸」也！另一方，「做又贏、唔做又贏」，那就是「無得輸」也！

老實說，以今天泛民議員的智慧而言，點做都死的！就算爭取到「單獨」與「高層」對話，你認為人家會靜心聽你哋啲進言咩？又以為可以玩番佢轉頭嗎？咪玩啦！

當大家看到中共在香港的那批代言人的嘴臉，有幾咁囂士得戚，有幾咁意氣風發，便知大勢已去了！但……不過……廣東老諺有云：「有賭未為輸」，唔到最後揭盅，輸贏未定的！

橫掂焗要北上面聖，我建議泛民遣派二、三線的青年梯隊小將上去，反正，只不過係當信差角色接聖旨之嘛！大佬輩就留番喺香港絕食，博同情，仲有睇頭也！就咁做啦！真係好橋呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府