SUN搞作：網絡小說：強國崛起大揭秘

「文化部長，強國教育及唔上我哋，但係點解強國可以崛起得咁快？唔通黃種人特別聰明？」好個黑人總統，或者因為自己打破咗膚色宿命，所以亦無睇低其他人種。「總統先生，據我哋調查，唔係因為黃種人天生聰明，而係強國提供咗特別幼兒教育環境，從小催谷佢哋。」

黑人總統大感疑惑：「我哋冇冒牌教師，冇黑心牛奶，冇豆腐渣校舍，幼兒教育環境點會輸畀佢哋？」「總統先生，你有所不知，強國小朋友日日返學，都會畀人秘密餵聰明藥，就連家長都未必知，相信呢個就係強國崛起嘅秘密！」

黑人總統聞言大喜，就好似睇到星星旗再次插喺世界之巔咁，只是推行全國餵藥，所耗不菲，實在頭痕。文化部長見總統額頭鑿住個錢字，即時獻計：「總統先生，強國以治水為名逼小學生捐錢，我哋都可以搬出防治颶風之名，要小學生嘔錢出嚟，咁就唔使煩啦！」總統先生大喜，餵藥大計亦正式展開。