城中鏡：象哥周身郁防立會辦公室熄燈
立法會近年推出唔少環保措施，好似以電郵發放文件同剪報、非繁忙時間停用部分升降機、使用自動感應照明系統等，淨係呢啲環保措施都幫立法會慳咗唔少資源。不過，據聞議員劉慧卿仍然嫌未夠慳，為咗更加環保、慳多啲電費，卿姐就建議將議員辦公室照明系統嘅亮燈時間，由依家嘅十分鐘縮短至五分鐘，如果五分鐘內感應唔到有人郁動，咁就會自動熄燈，唔使嘥電。
如果議員辦公室照明系統嘅亮燈時間真係縮短，象哥嘅體形係咪會fit啲呢？（資料圖片）
坐定定系統感應唔到
不過，聞說進出口界議員「象哥」黃定光就唔多贊成，因為依家議員喺辦公室坐定定專心工作時，照明系統就感應唔到有人大幅度郁動而自動熄燈，搞到辦公室會突然漆黑一片。所以議員每隔十分鐘就要停低手頭工作，起身揈揈手、踱踱步，如果真係縮短着燈感應時間，議員就要每五分鐘起身「做運動」，真係夠晒健康，唔知算係好定唔好嘞！
