城中鏡：李小加球場發威掃霉氣
港交所行政總裁李小加呢排唔多老利，眼白白睇住阿里千億元大刁去咗美國，港股市值、成交無法更上一層樓，港交所股價更加係難望翻身，不過小加總裁「股場失意，球場得意」，事關早前港交所同七家金融機構踢足球友誼賽，港交所都未完成晒所有賽事，已超班贏咗冠軍。如果港交所喺市值、IPO集資額全球排名都超班跑出，相信會有更多人高興！
李小加話係知道港交所捧硬盃後，先夠膽落場。（資料圖片）
講番球賽，八隊包括港交所、瑞銀、中人壽、西京、中銀保誠、RCM、法巴同一家經紀行。比賽係採雙循環賽制，即每隊要打足十四場。不過，港交所喺早段大發神威，遙遙領先，打到第十二場，港交所已領先超過六分，肯定攞硬冠軍。
小加係足球發燒友，間中都有落吓場玩吓。不過，佢就謙稱自己老啦，落場機會梗係要留番畀啲後生，佢都係知道港交所捧硬盃後，先夠膽落場！問起港交所有冇同證監會打番場友誼波，小加講笑咁話同證監會打波就要「鬆章」嘞！
