城中鏡：馬會主席拉斷繩理大新樓揭幕蝦碌

曾設計多個世界級地標建築嘅星級建築師札哈．哈迪德（Zaha Hadid），尋日駕臨香江為其首個香港固定建築項目「理大賽馬會創新樓」揭幕。大師駕到，城中名人同設計界猛人蜂擁而至，爭睹其風采。香港賽馬會主席施文信獲安排上台為大樓牌匾揭幕，點知佢一下就將條幕繩拉斷，搞到塊幕無法拉開，認真尷尬。

施文信（左一）不慎將幕繩拉斷（紅圈示），楊敏德（左二）同唐偉章（右）快步上前解圍。

楊敏德帶頭示範創意衣着。

國際知名建築師札哈．哈迪德親自為理大打造亞洲矚目地標。

顏吳餘英（左）與鍾志平齊爭睹建築大師風采。

楊敏德唐偉章打圓場

施文信拉斷繩後，十足小朋友做錯事咁，馬上將繩收埋在身後，露出尷尬笑容。幸好同台主禮嘅理大校董會主席楊敏德同校長唐偉章眼明手快，一個箭步上前用手將塊幕扯開，成功打圓場。如果理大搞扯大纜比賽，不妨請施文信出賽，肯定贏梗。

為賀理大創新樓新居入伙，楊敏德穿上著名時裝設計師Zang Toi一件釘上藍色珠珠、充滿民族特色嘅冷外套，佢又風騷地展示玉手上嘅藍色指甲油，笑言花咗幾日襯衫，誰知嚟到會場睇見一眾男士個個只着黑色西裝，感到好無癮喎。

耗資二億多元興建嘅理大創新樓，將成為亞洲設計界地標。理大校董會前主席羅仲榮、大學顧問委員會主席鍾志平同中華廠商聯合會副會長顏吳餘英都有現身揭幕禮。顏太同設計都好有緣，佢話中學時因家境一般，自己買布車校服，又自製喇叭褲，創意十足。