政壇：高盛銀行家髮型常規化

界內人士就話好多賓卡，喺返工時間蛇出去剪頭髮，佢哋唔要求靚，唯一要求係剪到好似冇剪咁，返去公司都唔會畀人發現，如果個個都差唔多髮型，更加神不知鬼不覺。

Rudy Milian由舊年年頭開始喺Salvatore專門幫高盛嘅銀行家剪頭髮，成間舖得三個髮型師。佢就用咗「灰暗年代」去形容幫高盛打工嗰一段日子，佢話嗰陣每日至少要幫二十個人剪頭髮，好多都係年輕銀行家，個個都剪一式一樣嘅頭髮，常規化到令人麻木，完全發揮唔到自己嘅才華。而且日日都早出晚歸，正確啲嚟講應該係加班加到半夜先有得收工，仲要好多時連晏仔都無時間食。

佢哋都幾分階級o架，好似高盛CEO布蘭克費恩，係老細Salvatore Anzalone親自操刀，其他人就幫啲中層或低級高盛員工剪頭髮。但係Milian就唔想再做重複嘅嘢，所以劈炮唔撈，走咗去紐約SOHO嘅Harry's做。