政壇：訪以考察鍾國斌騰雞
立法會議員經常都藉公務之名外訪，幾乎唔遠唔貴嘅都唔去。立法會工商事務委員會尋日就討論去以色列考察，睇下當地嘅創新科技產業同知識產權制度。不過，有議員就話當地政府扶助商界，如果喺香港照辦煮碗，政府就驚會被人話官商勾結；又有議員擔心依家以巴衝突咁犀利，去到以色列會唔會受到襲擊。班議員又話去外訪、但又要騰雞，正一又要威又要戴頭盔。
設計圖片及對白
驚被人話官商勾結
工商事務委員會計劃喺今年七月中下旬去以色列考察。其中資訊科技界莫乃光同工程界盧偉國都建議去到以色列時，大家應該要睇下當地政府點吸引企業投資喺創新科技產業，以及學術界同產業界點樣可以達到技術轉移。莫乃光仲話︰「我哋唔係去睇個人嘅嘢、影吓相。」
不過，議員劉慧卿就話，如果要扶助商界，就會涉及政府公帑，到時又會被人話官商勾結、利益輸送，「有啲官好驚呢啲嘢」。商界林健鋒就回應，都未起程去以色列，唔使咁「陰謀論」住，又話政府同商界唔合作係冇咩可以做到咁話。
咪睇紡織及製衣界議員Felix鍾國斌高頭大馬，對於去以色列最關心嘅就唔係去到睇啲咩，反而係安全問題。Felix喺會上就問，依家以色列同巴勒斯坦衝突，如果要去以色列，會點樣處理保安安全嘅問題。
林健鋒聽到Felix嘅擔憂之後，就話︰「大家唔需要好似鍾國斌議員咁擔心嘅，以色列好少有唔安全情況，保安都好嚴密。」佢仲話坐以色列航空公司嘅航班仲安全過其他航空公司喎！
