政客動口又動手 禮崩樂壞港蒙羞

嗱，立法會由聽日開始實施新嘅安檢指引，所有參與立法會會議及旁聽嘅公眾，都要通過安檢，出席會議人士入場亦要核實身份並作登記。對於有關措施係收緊公眾表達權利嘅質疑，立法會主席反駁話，公眾表達自由嘅權利，並唔包括可以向議員及官員投擲示威物品。

正所謂，君子動口不動手，如果將掟嘢同表達意見畫上等號，郁下就擲嘢「陳述觀點」，咁仲成世界？今次掟雞蛋，下次容乜易出動埋汽油彈o架，分分鐘搞出人命都似！

講真，立法會早就淪為政客做騷嘅場所，爆粗、掟物、拉布、流會，醜態百出。每逢開會，議事廳就變咗垃圾崗，示威物品無處不在，除咗橫額、標語、連手推車甚至義肢都有。

更離譜嘅係，部分出席人士將呢個莊嚴場所變做「戰場」，官員淪為「箭靶」。示威「道具」無奇不有，由公仔、水樽、紙飛機、香蕉到標語牌，甚至假牙都有。唔止擾亂議事秩序，更令香港斯文掃地，立法會變「垃圾會」，簡直冇眼睇。

立法會係商討政治經濟同民生大事嘅地方，無規矩不能成方圓，如果議員官員唔能夠安心討論，議事過程隨時受到干擾，甚至被迫中止，急需解決嘅議題就冇辦法充分討論，到頭來受損失嘅一定係普羅市民。

仲有吖，立法會運作成本一啲都唔平，每位議員月薪加津貼超過十萬元，官員更係薪高糧準，開會時間可以話「一寸光陰一寸金」，有人搞搞震嘥晒啲時間，呢條數又係要納稅人埋單，你話係咪靠害吖，叮！

無計喇，香港愈來愈政治化，立法會只不過係縮影咋。社會嚴重撕裂，唔同陣營勢不兩立，水火不容。呢嗱，每逢周末，雙方例牌會喺鬧市上演對台戲，而且氣氛愈來愈暴戾，甚至周不時發生肢體衝突，隨時累及無辜，你話唔驚就假。

家陣香港，經濟民生冇人理，示威暴戾「超英趕美」，表達意見嘅自由被一小撮「示威常客」同政客騎劫，曾經威絕亞洲嘅國際都會烏煙瘴氣，變成亂過亂世佳人嘅九反之地。計太一叮話齋，要扭轉正邪顛倒嘅局面就要正本清源，從淨化議事堂、整頓議事秩序做起，否則文革式動亂勢必喺香港上演，叮！