城中鏡：郭炳聯支持視障生音樂夢
繼早排去正生書院探訪後，新鴻基地產聯席主席兼董事總經理郭炳聯尋日又去到薄扶林心光盲人院暨學校探一班視障學生。原來郭炳聯舊年聖誕節已去過學校，仲畀一位失明同智障男生嘅音樂熱誠感動，決定資助學校聘請鋼琴同樂理教師，幫一班有天分嘅視障生實現音樂夢。
郭炳聯（右三）專程去探訪視障學生。
尋日班學生表演中國鼓同唱歌，其中一位失明及輕度智障嘅中三男生劉亦強就用鋼琴彈奏日本動畫《龍貓》嘅主題曲，又自彈自唱意大利民歌《我的太陽》。劉亦強雖然睇唔到嘢，但就有「過耳不忘」嘅天賦，一首樂曲只要聽過一次就會記得，真係犀利。郭炳聯盛讚劉亦強係天才，當佢知道亦強想做音樂家後，就決心要幫呢班學生。佢又話其實好多年前聽到心光學生唱歌已經覺得「好好聽，好有feel」，希望佢哋可以發展音樂才能咁話。
