今年雙春兼閏月，唔少人趁好年結婚，財經事務及庫務局局長陳家強就搶閘做新老爺。尋晚陳家喺香港會搞雞尾酒會，慶祝陳家強大仔David陳漢唐迎娶韓籍女友Dina Shin。數百名政商及學術界名人攜伴出席，包括特首梁振英、曾盛傳會參選特首但最終冇出選嘅馮國經，仲有喺特首選舉落敗嘅前政務司司長唐英年等人，熱鬧到極。

陳家強（左一）嘅囝囝陳漢唐（左三）同Dina （右三）拉埋天窗，數百嘉賓到場祝賀。

梁振英（右二）同太太唐青儀（左二）巧遇馮國經（右一及左一）夫婦。

唐英年最近忙緊家族教育基金工作，右為唐太郭妤淺。

葉劉淑儀（左）同立法會前議員梁劉柔芬（右）都有到場沾喜氣。

陳家強望落好後生，估唔到咁快就有新抱茶飲，其實David已經二十七歲，同Dina都係喺紐約從事金融業。做老爺嘅陳家強大讚新抱簡直係一百分，因為阿仔喺紐約淨係掛住工作，性格又外向，唔係太顧家，以前都冇打電話或寫電郵返屋企。但自從同Dina拍拖後就成個人唔同晒，唔止會發短訊畀佢，生日仲會寄電郵氹吓老竇，令佢喜出望外，而呢啲都係新抱嘅功勞。陳家強又話下周六一對新人會去韓國搞多次婚禮，到時佢同太太都會出席，太太仲會入鄉隨俗着韓服添！

尋晚到場賀嘅仲有曾掌舵恒生銀行嘅創興銀行副主席兼董事總經理梁高美懿、行政會議成員葉劉淑儀、最美麗港姐朱玲玲同唐唐夫婦等。問梁高美懿點解肯出山，佢就望住老公話最緊要梁生點頭，梁生就趁機投訴太太退休後都係冇時停喎！

唐唐講起近況，話最近開始擔任以爺爺唐君遠為名嘅教育基金理事，該基金設於上海，希望可以幫助內地有需要嘅人。

第一手消息請下載on.cc東網iPhone/iPad/Android/Windows Phone Apps