政壇：搞搞政：劉燕卿急頂檔掌申訴署
市民對政府部門或公營機構表現不滿，可以向申訴專員公署投訴。而申訴專員公署咁多年嚟，都踢爆唔少政府部門嘅甩漏，成功為小市民出番啖氣。現任申訴專員黎年三月尾正式卸任，政府尋日宣布由消費者委員會前總幹事劉燕卿接任。劉燕卿嘅「女包青天」形象深入民心，但佢過往三十多年消委會生涯嘅對手係商家，而未來要應付嘅係十幾萬公務員，的確係兩個世界。
設計圖片及對白
乏經驗恐被玩殘
申訴專員接收市民投訴個案後，有權調查政府部門同公營機構有冇行政失當，若果唔熟悉政府架構同運作，分分鐘被公務員玩番轉頭，調查完都係得個吉。所以過往申訴專員一職向來由資深政務官出任，貪佢哋了解成個官僚系統。但劉燕卿大學畢業後只做過消委會一份工，雖則期間兼任過唔少公職，例如食物安全專家委員會、旅行代理商諮詢委員會等，但始終缺乏同政府各部門交手經驗，究竟佢腰骨夠唔夠硬淨，會否畀公務員玩殘？睇嚟有待觀察。
再講，今次佢喺公布任命後不足半個月就要履新，畀人臨危受命嘅感覺。到底政府係咪搵唔到心水人選做呢個三煞位，先急急腳搵佢頂檔呢？再講佢已年屆六十二歲，只比將退任嘅黎年後生一年，如果黎年夠鐘退休，劉燕卿又憑咩做足五年任期呢？實在令人費解。
