政壇：興業開分行多猛人到賀

興業銀行尋日喺香港開海外第一間分行，財金界猛人空群到賀。數數手指，香港自○九年國家開發銀行後，已經五年冇見過咁墟冚嘅銀行分行開幕禮。

興業銀行董事長高建平（右）同香港分行行長胡麟，喺開幕禮笑到見牙唔見眼。

今次興業銀行請嚟唔少猛人嘉賓，財經界方面，就有署理財經事務及庫務局局長劉怡翔、人保集團副總裁周立群、恒生副董事長兼行政總裁李慧敏等，主人家就總動員喇，董事長高建平同埋幾十位職員到齊香港，加上大批獲邀嘉賓，開幕場地企到滿，星光熠熠。

興業銀行香港分行行長胡麟話，興業落戶香港係將本港視作通向海外發展嘅平台，希望興業香港可以為本港經濟作出貢獻，不過會唔會喺香港上市就要由總行董事會決定。