政壇：李家誠入諮詢組織獻策
政府設立咗唔少諮詢組織以吸納社會各界人士，為政府出謀獻計，近排唔少企業生力軍陸續被網羅。政府尋日就公布委任新一屆「太平洋經濟合作香港委員會」成員，就有多名二代身影，好似新委任嘅恒基副主席李家誠，續任嘅就有德國寶董事長陳國民嘅千金陳嘉賢。
政府委任李家誠出任「太平洋經濟合作香港委員會」成員。（資料圖片）
唔知李家誠會唔會好似佢哥哥李家傑咁，遲啲對時事及民調都有一番見解呢？
睇番張委任名單，除咗呢兩位企業二代外，仲有幾位新面孔，當中欽博凱都算係傳奇人物。佢係英國人，但就對中文有非常大興趣，喺劍橋大學中文系畢業後，加入太古集團，先後喺台灣、香港工作，之後移居西安，○八年北京奧運會仲喺西安做過火炬手，依家就喺太古嘅合資企業大閩國際控股擔任營運總裁。而貿發局研究總監關家明就接替退咗休嘅梁海國。其他連任者仲包括新婚幾個月嘅中大社會科學院副教授沈旭暉等人。所有成員任期由下月一日開始，為期兩年。
