政壇：岑智明愛集舊相做偵探

岑台長話早排喺拍賣網見到呢張相，覺得非常罕有，事關攝影者捕捉到一九三七年颱風襲港時嘅沉船一刻，佢一心想投得，但一個唔留神就畀人搶走咗，後來先知對手係香港收藏家協會副會長張順光。冇耐張順光知道佢對張相情有獨鍾，於是就用幾百蚊割愛出讓。

岑智明話初初都唔知影相地點喺邊，費盡心思研究都諗唔到，又試過問收藏家朋友，但都得唔到答案，後來索性將相片放喺討論區問人，第日有個網民認得相中一間工廠，先至揭開謎底，原來相中地點係銅鑼灣。解密過程咁刺激，難怪佢話喜歡收集舊相原因之一就係可以做偵探咁話。