政壇：少後生選民 譚志源頭痕
政府近日開始新一輪嘅選民登記活動，呼籲市民盡公民責任，登記做選民，點知年輕選民登記人數未如理想。咁點算好？政制及內地事務局局長譚志源當然甩唔到身，就算爆頭都要諗吓計喇！
設計圖片及對白
電視網上宣傳
立法會政制事務委員會尋日開會討論選民登記問題，選舉事務處總選舉事務主任李柏康大呻唔少年輕人政治冷感。佢話雖然十八至二十五歲嘅選民登記率已由○九年嘅百分之四十六，上升至舊年接近六成，但呢個年齡組別嘅登記率仍低於整體登記率，又話年輕組群一直都係佢哋重點宣傳目標。佢又透露，選舉事務處今年為選民登記活動預留五百七十七萬元，主要透過電台、電視台、網上平台，甚至去大學同中學張貼宣傳海報，呼籲青少年登記做選民，比舊年增加百分之十四。
有議員質疑當局雖然使咗唔少錢，但都係吸引唔到後生仔女登記做選民，問當局仲有無其他更新穎嘅方法。李柏康就話選舉事務處之前試過喺網站刊登宣傳廣告，但就無乜成效，所以當局依家採用另類策略，包括派職員親自去中學游說學生登記做選民，又會喺全民運動會、青年馬拉松，甚至大學開放日宣傳，總之就無孔不入，誓要推高青年登記率咁話。佢講到當局要化身社工提供外展服務，搵青年人登記做選民咁喎！
人民力量陳志全就實際得多，話記得自己讀書嗰陣，學校話只要同學或者屋企人肯登記做選民，就會有間尺送，問選舉事務處會唔會效法呢個方法，「利誘」未登記嘅市民。李柏康未有正面否定建議，話當局會審慎考慮任何有利增加登記率嘅建議。如果政府真係想鼓勵青少年登記做選民，譚志源同李柏康就應該加多兩錢肉緊諗多啲新橋嘞！
