吃喝玩樂新天堂 大嶼財來自有方

即係咁，港珠澳大橋兩年後落成，港府銳意推動「橋頭經濟」，仲話要建設「東大嶼都會」添。有人就提議，當局應該向前行多步，將大嶼山發展成為包括主題公園、生態旅遊、度假酒店同賭場娛樂在內嘅「四合一」旅遊新天堂。

唔係冇理由o架，權威分析認為，香港可借鏡新加坡經驗，加入「綜合度假村」元素，透過引入博彩娛樂場產生嘅輻射效應，推動其他產業發展。亦有分析員認為，本港具備開發博彩業嘅條件，一旦成事，每年對香港GDP嘅貢獻將超過百分之二，相當於四百億元，可謂富貴逼人來！

講多無謂，睇數據最實際。新加坡○五年開始發展兩個綜合度假村，直接或間接創造三萬五千個職位，到一○年兩個項目落成開業，五年間GDP平均年增長百分之十二點二二。相比之下，香港同期增長率連獅城一半都冇，得百分之五點二三，正一蚊髀同牛髀，GDP前年仲畀新加坡爬頭添，認真羞家！

正如學者話齋，博彩業對一個地區嘅經濟增長有好大推動作用。近年博彩業以綜合度假活動為包裝，加入旅遊娛樂元素，帶動相關產業發展已經成為趨勢。有投資顧問認為，本港背靠中國內地，鄰近東南亞，客源充足，完全有條件發展博彩娛樂業務。

當然喇，發展博彩業話題敏感，一定會有團體提出質疑。其實多年前已經有人建議喺大嶼山「開賭」，因為爭議太大未能成事。不過咁，此一時，彼一時，近年亞太經濟蓬勃，發展旅遊及博彩業已成為大勢所趨，香港再唔與時並進，跟上潮流，遲早被邊緣化嘅咋。

古人話，苟利於民，不必法古；苟周於事，不必循舊。要發展就唔可以因循守舊，其實只要有良好管理，博彩業完全可以健康發展，不必視為洪水猛獸。呢，其他地區已經有唔少成功經驗，可以學新加坡咁，嚴格限制本地居民參與賭博；亦可以學馬來西亞雲頂娛樂城咁，只係接待外地遊客；亦可以學本港有人建議咁，只准場內投注，並採馬會模式，規定賭場收益捐畀慈善事業。總而言之，條條大路通羅馬，事在人為啫。

衝出圍城覓生機，敢教大嶼換新天。近年香港愈來愈政治化，嘈嘈吵吵，內鬥內耗，經濟民生冇人理，坐困愁城，苦無出路。香港既然「馬照跑、舞照跳」都得，大嶼山發展博彩娛樂，北大人開綠燈亦冇乜懸念。機不可失，時不再來，香港盛衰就喺港府一念之間咋！