機會係要自己爭取嘅，少膽虫亦深明呢個道理，所以決定主動出擊爭取加薪。經過連夜思前想後，終於鼓起勇氣去敲淫賤黎房門。

「腦細，我有嘢想同你傾。」淫賤黎大感詫異︰「次次都係我搵你，估唔到你會自動送上門，有屁快放！」少膽虫放膽講︰「我想傾吓加薪問題。」「廢話！」淫賤黎即刻變臉︰「上次咪話咗要學鬍鬚曾，加少啲避財赤囉！仲有乜好傾？」

少膽虫有備而來，當然唔會畀佢拋窒︰「腦細唔使擔心，我已經諗到開源妙計，咁就算加薪都唔會財赤啦！」淫賤黎一臉疑惑︰「講嚟聽吓。」「考評局咪話要加考試費嘅？我哋照辦煮碗，扮高薪請人引多啲人嚟見工，繼而加收面試費同筆試費，到時就包保財源滾滾啦！」淫賤黎聽完即時直豎拇指︰「不愧係腦腫，果然好計！」少膽虫由心笑出嚟，「多謝腦細，咁我可以加幾錢呀？」「見你咁醒，就加你兩蚊啦！」

第一手消息請下載on.cc東網iPhone/iPad/Android/Windows Phone Apps