城中鏡：顧紀筠拍賣自家設計腕錶
陀飛輪錶有好多捧場者，熱衷設計腕錶嘅顧紀筠最近有新動作，佢透露，自家設計嘅兩隻陀飛輪錶將由保利香港拍賣有限公司拍賣，佢開心之餘，又有啲緊張：「今次以好吸引嘅半價價錢做底價拍賣，好緊張。因為我冇開舖，之前都係自己戴或者朋友買。今次可以睇到腕錶嘅受歡迎程度。」
顧紀筠話拍賣自家設計嘅手錶，可以令佢知道受唔受歡迎。
顧紀筠話，佢設計嘅腕錶每隻限量一百隻，每隻均有編號，部分特別編號早已斷貨：「我自己嗰隻係0號。我有朋友話買唔到88號，問我有冇188號。不過我出一百隻，冇辦法。」嚟緊佢打算設計華麗嘅男裝腕錶，預計年底推出，仲講笑屆時畀老公率先挑選心水編號。
講到今次拍賣嘅兩隻腕錶，佢透露商品編號有特別意義：「佢哋嘅商品編號分別係901同1224，係我同老公嘅生日日子。」
