城中鏡：「塑」造年輕化 梁馨蘭反傳統
香港塑膠業廠商會日前舉行晚宴，業內唔少老行尊都有出席，場中仲有紅Ａ塑膠產品創辦人梁知行孫女梁馨蘭（Jessica），講到塑膠業嘅前景，佢透露公司近期請咗一班後生設計師幫手，打算轉型走年輕路線，將傳統塑膠產品做出青春味，呢個決定本身都夠晒創意！
梁馨蘭計劃將家族塑膠生意轉型走年輕路線。
孫榮聰（左上）與弟弟孫榮良（右上）、爺爺孫建超（右下）及嫲嫲郭燕萍（左下）組成工業世家。
陳偉文父親陳禮信（左）與林亮係工業界相識多年嘅老朋友。
塑膠產品曾經喺香港製造業界雄霸一方，相信好多人腦中仲記得紅色膠水桶、返學用嘅太空篋、塑膠漱口盅、甚至喺大牌檔見到嘅經典膠櫈等，呢啲亦係唔少港人嘅集體回憶之一，不過，傳統品牌塑膠公司亦要面對時代需求，改革創新天，接手家族塑膠產品生意四年多嘅Jessica話，佢哋計劃將沉寂多年嘅品牌轉型，所以吸納咗一班年輕設計師幫手，希望打破幾十年來傳統家品嘅形象，採用更多色彩及設計元素，務求設計和實用兼備。佢哋去年仲開始同理工大學合作，由學生分組設計新款式膠櫈，再研究生產和推出市場嘅可行性。
自置物業免捱貴租
工廠北移，令「香港製造」呢四個字已經買少見少，但Jessica就話冇諗過將廠房搬返內地，事關佢哋位於新蒲崗嘅廠房係自置物業，唔使捱貴租，令成本可在控制範圍，得以維持本地生產。
當晚同場仲有唔少業界前輩現身，好似以生產膠鴨仔揚名、有「變形金剛之父」外號嘅工業家林亮、建樂士企業董事長孫啟烈及身兼香港塑膠業廠商會主席嘅兒子孫榮聰等。會長陳偉文話，對業界前景非常樂觀，認為內銷及環保係大趨勢，打住本地品牌旗號開拓內地市場始終有一定優勢，而且塑膠製品非常生活化，每一個層面都有出路喎。
