政壇：搞搞政：陳家洛 張國柱變問題中年
財政預算案發表後，立法會議員就按傳統向當局書面提問，呢個俗稱「入Q」嘅行動係畀議員就佢哋想跟進嘅開支細項作回應，立法會秘書處嘅統計顯示，今年班議員已經入咗六千八百二十五條問題，破晒多年紀錄，泛民嘅陳家洛及社福界張國柱更成為議會「Q王」，兩人分別入咗超過六百條問題，可以話係名副其實嘅問題中年。
設計圖片及對白
去年議員提問咗五千四百七十一條，今年嘅問題明顯多咗約四分之一，陳家洛亦由去年問五百條加到六百一十五條問題，質問嘅內容包括民政、發展、教育等。對於咁多問題，佢解釋班議員助理好搏殺，想突破自己嘅能力，冇乜怨言喎。
不過「問題中年」之最要數張國柱，因為佢問咗六百五十七條問題。因乜解究問咁多呢？阿柱就話三分之一問題都係問社署，話晒佢係社福界代表，又話好多福利津貼，都要問受助人數、涉及開支等數字，睇吓每年嘅趨勢。據聞「長毛」梁國雄都入咗三百幾條問題，仲要專問各司局長人工、津貼等，擺明就係為預算案「拉布」鋪路啦！
