政壇：電視牌照風波莫乃光冇覺好瞓
流動電視牌照風波連日上映，立法會資訊科技界議員莫乃光（Charles）都呻冇覺好瞓，事緣港視主席王維基對通訊事務管理局辦公室指他擬用嘅傳送制式可能違規，連日同通訊辦駁火，Charles作為業界議員，梗係免不了畀人問意見，偏偏呢段時間佢身在美國，結果佢喺社交網站留言話，最近喺美國東岸晚晚冇得瞓，一路接受傳媒訪問至半夜四點鐘。
莫乃光為咗回應王維基同通訊辦駁火單嘢，搞到冇覺好瞓。（資料圖片）
Charles今次美國之行先後到過華盛頓、波士頓等城市，其中離開華盛頓前參觀咗新聞博物館，形容係非常好嘅公民同歷史教材，提議香港新聞界係咪可以搞番個類似嘅永久展館喎。講開又講，早前有指立法會再現退會潮，有傳話Charles同批發及零售界議員方剛都榜上有名，但原來只係一場誤會，查實佢哋二人都有加入醫療保障計劃小組成為新任成員。
