政壇：調查out晒象哥畀人笑
內地旅客湧港，不但喺地區造成購物人海，更引致激進嘅抗議行動，事件引起各界關注，正在開兩會嘅中央大員亦有開腔。不過，本地政黨卻表現遲鈍，建制大黨民建聯尋日公布一個調查，確認四成受訪嘅市民覺得本港嘅購物環境「非常擠迫」，主持個記者會嘅建仔成員、進出口界代表黃定光（象哥）喺會上大講擠迫之患會削弱本港對遊客嘅吸引力，中央都出咗聲，政黨仲要花資源去研究，扮有發現，真係後知後覺！
設計圖片及對白
建仔呢個調查以電話訪問咗一千六百個本港市民，了解市民對內地旅客來港有冇增加購物區擠迫？香港嘅消費處所如何等？呢個調查如果提前喺一年前或半年前做，相信好多選民都會好欣慰，最少可以證明擁有資源同人手嘅政黨敏感地發現可能有問題，亦細心地為市民前瞻可能對香港有大影響嘅事。可惜，啲政黨並冇呢個能力，依家內地已經指示港澳辦、國家旅遊局着手研究，建仔先急急跟進，選民睇到都心酸喇。
倡落馬洲建購物中心
睇番佢哋嘅結論，逾四成受訪者話香港購物環境「非常擠迫」，逾七成受訪者指本地商場千篇一律、缺乏特色，跟住有六成受訪者贊成喺邊境興建購物中心，疏導旅客人潮，呢啲結果對感到困擾嘅港人猶如阿媽係女人，建仔嘅研究團隊抵打之餘，象哥都難免畀人笑。
點都好，建仔尋日都拋出建議，希望政府落實喺落馬洲興建購物中心，以市集形式推行，估計可容納四萬人。或者，呢個建議先係主菜，只係包裝太過時啫。
