好心啦，福心啦，施捨個發財錢……假乞兒嘅特色係扮可憐，呢頭跪地乞錢，嗰頭花天酒地，大家早就見怪不怪。估唔到公營機構亦有呢種人，一邊呻窮，一邊自肥，稱之為乞兒部門，一啲都冇誇張o架。
嗱，考評局就係其中一個嘞。該局好學唔學，專學財政司司長曾俊華，不斷高叫「狼來了」，話由於通脹壓力及適齡考生人口下降，未來可能會出現結構性財赤危機，所以明年或者需要調升考試費百分之一至二，以維持財政穩健咁話。
本來呢，如果考評局真係財政緊絀入不敷支，酌量提高考試費，相信唔係大問題，市民都可以接受嘅，不過事實啱啱相反，該局一二至一三年度錄得高達六千萬元盈餘，今年仲繼續向一成員工分發二百萬元花紅添，咁都仲要呻窮，呃鬼食豆腐咩。
仲有吖，考評局唔止有盈餘發花紅，今年仲向全體員工平均加薪百分之四點五添，無論點睇都唔似將會出現結構性財赤喇。計太一叮話齋，考評局係公營機構，唔係牟利機構，職責係服務考生，而唔係榨取考生，既然有盈餘派花紅咯喎，考試費唔應該加，反而應該減就真！
話時話，考評局呻窮都唔係第一次嘞。舊年十月，本報踢爆考評局以公肥私，呢頭向立法會成功申請約九千萬元撥款補助，嗰頭卻向九成員工大派合共七百萬元「特別獎勵金」，變相用公帑分花紅，簡直離晒大譜。
其身不正，何以正人。考評局烏煙瘴氣，醜聞百出，如果由市民評核，早就肥佬，好心港府快啲履行監管嘅職責，對呢個大花筒衙門進行整頓喇。不過講開又講，所謂上樑不正下樑歪，考評局搞到成個發錢寒咁款，唔係冇原因嘅。呢，鬍鬚曾咪一樣咁縮骨，明明庫房水浸，儲備豐厚，居然成日嗌「狼來了」，仲話七年後可能會出現結構性財赤添，搞到預算案要大幅減甜，引起怨聲載道。最搞笑嘅係，鬍鬚曾為咗替預算案減甜解畫，日前仲以龜兔賽跑來形容港府嘅開支及收入，話開支遲早會超過收入喎，簡直九唔搭八。你話嘞，財爺都咁涼薄咯，考評局有樣學樣又有乜出奇吖。
咁講喇，如果政府真係想做到「適度有為，穩中求變」，就算管唔掂守財奴財爺，都應該約束一下考評局，唔好向考生開刀，如果唔係，盞搞到連學生都上街嘅咋，叮！
第一手消息請下載on.cc東網
