城中鏡：馬雲7日玩勻意美法
陽春三月，阿里巴巴主席馬雲偷閒去咗遊埠，佢喺自己嘅網上陣地風騷披露，用七日時間去咗美國、法國和意大利三個國家共六個城市，喺法國和意大利期間，佢見咗好多政府官員和企業家，包括年僅三十九歲嘅意大利新任總理倫齊，以及幾位法國部長，馬雲話大家一講到喺淘寶網上賣法國和意大利產品都好興奮，佢相信網購會影響愈來愈多國家經濟同年輕人嘅生活方式。
馬雲旗下公司啱啱宣布收購大計，佢卻去咗三個國家偷閒。（資料圖片）
馬雲喺貼文中話，細個時最希望早上喺紐約食早餐，中午去巴黎，再飛到布宜諾斯艾利斯食晚餐，呢次行程令佢明白其實咁樣非常攰，尤其係公務之外，佢又唔放過遊覽良機，喺巴黎時，佢就抽時間去咗二戰最著名一場戰役所在地諾曼第，回想當年英美聯軍登陸之地，佢話好難想像當年嘅戰爭場面。
佢仲有感而發談法國嘅戰爭，話據說以前打仗時，只要巴黎聽到城外敵軍槍炮聲，就會為咗保護城市文化而放下武器，唔知係真定假，但佢就肯定法國人同中國嗰種「寧為玉碎，不作瓦全」呢種想法相反。
