內地領導常有高見，叫本人心悅誠服，兼唔使錢買飛入場，都能欣賞娛樂性豐富的棟篤笑。最近一單，乃係《水土不服論》。
何謂「水土不服」呢？市井師奶語曰「即係腸胃不適，食乜嘔乜囉！」離地學者的理解係「文本表徵內向式佯謬意圖的質變現象」（唔明？即證明你係個正常人）嗱！江湖玄學大師會話「今年五黃在東，出事啦！你畀五皮嘢我！幫你起個卦，擺個陣，袋個符，包你無事！」政治粉皮效忠說：「阿爺的話，我全部服晒，有乜頭暈身熱，與我無關！」
高官的《水土不服論》，只得一個觀點，就係佢話乜便是乜，無甚邏輯可言，佢話你水土不服，你就水土不服，唔使拗！
文化研究角度拆解，上述《水土不服論》，只是個政治寓意，一諗就壞腦，簡單而言，係「文化差異」而已！那又沒錯的，中國泱泱古國五千年，何須要命短的外蕃那些洋制度來說三道四，干擾本國特區內政；咱們中華民族，自有本質性生活方式，西方文化不一定啱我哋用嘅！你要佢哋唔畀人管，係唔得o架！即如佢哋講電話唔大聲嗌，會怕另一方聽唔到的呀！又例如，在中國做官，唔貪點做得成官呀？中國五千年來都係君主制，你畀佢哋「自選」一個人做皇帝？佢哋會怕畀雷劈o架！但「水土不服」的文化差異呢家嘢，有時又會有例外的，即如依家領導都唔着龍袍「上朝」，卻穿鬼佬西服打領呔，坐喺有外國發明的「空調」室內，用西洋揚聲器演說開會，仲唔係講儒家思想，反而講「民主」（講咋！），睇見真係師奶式水土不服囉！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
第一手消息請下載on.cc東網
