SUN搞作：少膽虫手記：多得鬍鬚佬
少膽虫垂頭喪氣返到公司，就即刻呻慘：「腦細，我哋又畀人『唱』啦！」淫賤黎笑笑口：「係咪錯誤報道搞手嗰單？好小事啫，年中我哋都作唔少新聞，呢啲咁濕碎嘅嘢，何足掛齒？」
少膽虫緊握拳頭，眼泛淚光，「係加薪呀！明明今年通脹成4.6%，我哋位位都只係加3%！邊夠生活？仲有，虫身為腦腫嚟，為《爛果》仆心仆命、赴湯蹈火，點解……同基層員工嘅數值係一樣？」淫賤黎不耐煩咁話：「有得加，仲唔笑？喺度嫌三嫌四？壹全霉蝕成咁，我都唔實施凍薪，依家荷包好肉痛喇！」
少膽虫唔忿氣咁話：「周街啲人都笑我哋『加薪低到無倫』呀！」淫賤黎得戚回應：「識咩吖你，學鬍鬚佬話齋，謹記龜兔賽跑嘅古仔，烏龜代表收入，白兔代表開支，只要白兔唔再瞓覺，就遲早一定超越隻龜，咁咪赤字囉！我都係跟佢學嘢咋，嘻嘻！」
少膽虫心入面諗：「唉，連鬍鬚佬都擺上枱，點夠腦細你講吖……」
