港聞
  • 陳鑑林

    內地樓市價值看漲,本地又有雙辣招,據聞好多人都越境買樓,我哋近日睇過立法會議員個人利益登記冊,發現議會磚頭派又出動,投資有道嘅建制派議員陳鑑林去年十二月二十八日起,申報成為一間公司Kingrich Trading Co. Ltd. Liberia嘅董事,了解之下,佢承認開設公司目的係為咗投資物業,至今佢已喺內地買咗一至兩間物業,主要用來收租。

    做過房委會委員嘅陳鑑林(橄欖)話,香港樓價好高,稅又收得重,唔係理想嘅買樓時機喎!佢一向有投資物業嘅興趣,多年來立法會嘅申報亦可見佢喺港、九、新界及內地持有物業,○五年曾有報道就話佢擁有七個物業。

    另一個愛買磚頭係建制派嘅梁美芬,最新資料顯示,今年二月十四日情人節當日,買咗一個美國物業,佢透露個單位喺加州,面積唔係太大,話係投資顧問建議佢用嚟放租嘅。睇番資料,梁美芬自○八年當選立法會議員後,由一開始喺西半山、九龍西、汀九及屯門擁有六個物業,之後頻頻買入賣出物業,但就賣多過買。一○年十一月政府率先落實額外印花稅(SSD),佢就只係喺九龍西買過樓,到依家就只剩下三個物業,樓價依家又見回落迹象,睇嚟梁美芬W對投資物業都真係有一手喎!

    第一手消息請下載on.cc東網iPhone/iPad/Android/Windows Phone Apps