陳灶良話會向鄉議局提出搞好轄下青委會。（資料圖片）
鄉事派組黨計劃一時一樣，鄉議局高層嘅言論更有隨口噏當秘笈嘅感覺。雖然最近聽聞佢哋好大機會組唔成黨，但近年加入鄉議局做特別議員嘅大埔區議員陳灶良就認為，鄉議局已日漸老化，培育年輕新血最重要喎！但點樣培育呢？
陳灶良話，鄉議局唔係冇人才，只係肥水已流向別人田，近年唔少鄉紳嘅仔女都加入咗其他政黨，甚至加入泛民主派政黨，結果佢哋啲父母差啲搞到要同鄉議局割席，如果情況再惡化落去，鄉議局就會青黃不接，日漸老化。
陳灶良認為目前應該要搞好鄉議局轄下青年事務委員會，提拔局內執委、當然議員及顧問等鄉事派成員嘅仔女參與鄉議局事務，到選舉時，就可箍番緊啲後生原居民嘅票源。
近年每逢農曆新年，陳灶良都全力搞旺林村許願節活動，去年亦有向盛事基金申請百萬元資助，但佢就埋怨好難申請，兼且欠缺靈活性，最終蝕錢收場，所以佢哋今年農曆年已經冇再申請基金，雖然係咁，但都錄得可觀嘅盈利。
第一手消息請下載on.cc東網
