樂美美講起兩個囡囡就甜笑到漏。
香港汽車會永遠榮譽會長雲維熹（Wesley）最近添喜事，佢女友樂美美（Doyie）上月初幫佢添咗第二名BB女，母女平安。早幾日我哋喺中環一個時裝騷見到樂美美，佢話BB女好湊又好食得，啱啱滿月冇耐就已經肥嘟嘟，非常得意。而佢自己就日食一隻雞補身，養好身體以便餵人奶，幫寶貝女兒儲備抗體咁話。
乖女出世似爸爸
但早輪香港一度禁雞喎！Doyie笑稱完全冇問題，食冰鮮雞一樣咁補身喎！Wesley係成吉思汗第二十九代傳人，BB女就係第三十代後人，咁BB女似邊個多啲？靚媽話細女出世時同家姐一個餅印，即係似爸爸，但依家就似媽媽多啲喇！
Doyie又話家姐好錫妹妹，會學陪月姐姐嘅手勢，拎張紙記低妹妹幾時飲奶、換片，仲會幫手抱抱及餵奶，眼見兩姊妹咁親近，佢自覺好幸福。咁會唔會再追多個呢？Doyie笑住咁話：「順其自然啦！」
第一手消息請下載on.cc東網
