政府問責第二梯隊早前爆完一輪跳船潮後，多個職位都陸續補番人手，尋日當局再宣布發展局政治助理都搵到人，接任人並唔係新面孔，而係曾經做過候任特首辦項目主任嘅馮英倫，佢將會喺下星期一到任。發展局係是非地，局長陳茂波同前政治助理何建宗都因為家人或家族公司持有新界東北地被指涉利益衝突，而馮嘅未來頂頭上司陳茂波又係官場煩惱人，馮英倫尋日表現得冇有怕，強調自己係「三無」人士，即係無物業、無地兼無感情缺失，仲連家人都冇任何物業地皮喺新界東北。

聲明有針對性

發展局職權廣，新界東北發展、大嶼山發展、賣地政策等全部係發展局範疇，馮英倫走入呢個是非地，當然唔會冇準備。尋日政府公布任命之後，馮英倫接受一個網媒訪問，對未來工作嘅敏感性有晒心理準備，一無物業、二無地，三無感情缺失嘅聲明，更明顯有針對性。

馮英倫港大畢業後就幫梁振英做咗七年公務助理，專責做文膽。

到CY參選特首時，佢索性做埋競選辦一員，之後又做咗候任特首辦項目主任。特首選戰之後，佢投身商界，先後喺多位人大、政協嘅私人企業打工，無論商界、政界都有唔少人脈經驗。

不過瓣數多多嘅馮英倫以後有繁重嘅工作，嗰啲如中華全國青年聯合會委員、菁英會副秘書長、香港青年聯會會董等職位，唔知會唔會慢慢卸低呢﹖

其實有無物業根本唔係重點，最緊要跟足規矩申報利益啫，唔通真係好似上水鄉事委員會主席侯志強話齋，政府要搵啲冇物業嘅「廢人」做嘢咩？

第一手消息請下載on.cc東網iPhone/iPad/Android/Windows Phone Apps