港鐵又賺大錢 發財何時立品
中國人有句說話叫「發財立品」，一個人發咗達，應該做善事幫吓窮人，而一間公司賺咗大錢，當然亦應該對社會有所貢獻喇。嗱，港鐵尋日公布去年業績，一如既往賺到盆滿缽滿，喺咁嘅情況下，作為全港最主要嘅公共交通機構，港鐵係咪應該發財立品，回饋乘客呢？
即係咁，港鐵舊年錄得逾一百三十億元巨額盈利，話就話按年微跌百分之二點六，實際上經常性盈利升咗百分之八，包括客運業務、車站商務及物業租賃管理等收入全線上升，整體盈利之所以下跌，皆因港鐵近年冇物業推售，喺地產方面賺少咗咋。即係話，港鐵盈利基礎非常穩健，完全有能力回饋乘客。
咁講喇，作為上市公司，港鐵賺大錢固然可喜可賀，為股東謀取最大利益亦無可厚非，之但係咁，作為公交機構，港鐵年年賺大錢而唔識得改善服務，而且年年加價，咁就講唔通喇。係人都知，近年港鐵事故不斷，唔係停電就裂軌，唔係飛站就冒煙，簡直無奇不有。淨係上個月咋，大小事故就有七宗，最大鑊嗰次係東鐵大學站因絕緣體失靈導致電力故障，令列車服務受阻四粒鐘，而之後嘅油塘站架空電纜跳掣事故，更擾攘咗五粒鐘添。你話嘞，今時今日咁嘅服務態度，又點得o架！
正如工會踢爆，港鐵系統老化，資深員工紛紛退休，加上港鐵為咗節省成本而將部分維修工序外判，而外判商又良莠不齊，管理層疏於監管，放任自流，想唔出事都幾難喇。
講到底，港鐵服務烏龍百出，事故不斷，管理層固然有責任，而作為最大股東嘅港府更加責無旁貸。去年檢討票價可加可減機制，話就話加入懲罰措施，只要港鐵服務嚴重延誤，當局就會向港鐵罰款，最低一百萬元，最高一千五百萬元，實際上，對於年賺過百億嘅港鐵嚟講，呢啲所謂懲罰等於九牛一毛，毫無阻嚇力可言。再講喇，罰公司而唔係罰管理層，個個關人個關，根本無補於事。
年年賺錢，年年加價，港鐵公司為富不仁，搞到市民怨聲載道。可能知道眾怒難犯啩，港鐵宣布下季推出與利潤掛鈎嘅車費優惠計劃，列車服務若因事故而長時間受阻，亦會透過「即日第二程車費九折」形式，向乘客提供車費優惠喎。其實計太一叮話齋，呢啲小恩小惠純粹得啖笑，港鐵與其整色整水，不如直接減價仲好喇。當然，最緊要都係盡快更新系統，杜絕事故，否則，萬一爆大鑊咯喎，就算賺幾多錢都補唔番喇，叮！
