點解香港人生活得咁唔Happy呢？嗱！有東江水你哋飲吖！有大陸運來的糧食供應啫！又有鬧領導的自由噃！另外，祖國的關懷，見你哋沙士爆發大大鑊，便大力開閘，放啲豪情有錢人落嚟消費，打救你班可憐人；加上，見你哋呢度個廢柴政府豢養埋班庸廢奴才，唔識做嘢，於是連西環啲同志都奮力做埋一份，你班香港窮鬼仲唔心足？還成日怨活得不快樂？使唔使畀個官你做呀！

唉！食得飽、穿得暖，係靠我哋自己三十蚊個鐘捱番嚟o架咋！要付錢交換o架！

呢度啲人，鬱悶寡歡，係睇住一處好地方崩壞，連最後的核心價值，即法治精神，都頓然消失呀！

上星期中西區議會傾公民教育撥款，該小組主席李志恆廢噏「憲法文件」不能公開討論，並call差佬到場，粗暴抬走與會的議員離場，明顯違規違法；點知，有人話係「履行緊『確保社會安寧』嘅法律責任」喎！而且仲惡形惡相說：不了解的話，可以返去同法律顧問講講……喂！吓吓搵法律顧問？最平嗰位，千五蚊一個鐘，淨提供解答意見咋！

香港人不快樂，就係睇到好多聲大大、有權勢兼兇巴巴的粉皮不守法地在攪亂社會安寧；劈人的刀手連毛搵唔到條，卻又個個月出糧，叫人氣結。

十七年前香港警隊，是全球有名的精英部隊，現只是中國大陸區域內的一群公安城管，這是本地原住民心痛不安的原因之一。

香港人，認命吧！笑吓啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps