SUN搞作：少膽虫手記：靈魂遭挖空
新聞吸引之處，在於往往好睇過戲，就好似有幾位公主電郵畀傳媒求救，話佢哋畀國王老竇禁錮，無自由，失自由，深宮痛哭眼淚流，少膽虫我睇見都覺得過癮，亦都印證咗本虫係一個冇乜同情心嘅人。之不過，本虫其實對幾位公主嘅痛苦有切身感受，尤其係「靈魂遭挖空」呢句說話，對壹全霉員工嚟講，真係切膚之痛呀。
活喺淫賤黎嘅淫媒王國，你想有口安樂茶飯，就要全心全意宣淫販賤。回首過去，多少懷住熱誠嘅年輕人入到壹全霉，就係畀淫賤黎挖空靈魂，做咗淫媒棋子，真係令人惋惜。好似肥豪同膠蘇咁，初初加入壹全霉仲係兩個戇男，點知畀淫賤黎調教完之後，骨子裏嘅淫賤基因大爆發，每逢見到風化新聞就爭住做，有次仲打起交添，你都咪話唔恐怖。
至於淫賤黎呢？佢身為呢個淫媒王國嘅話事人，梗係要時刻保持淫賤啦。唔講你哋唔知，其實淫賤黎每日返工，有九成時間都係睇鹹書上鹹網，作為壹全霉嘅掌舵人，真係少啲精力都唔得。
