城中鏡：王英偉行善不離好兄弟
名人行善，五花八門。鄰舍輔導會早前舉行慈善晚宴，晚宴籌委會聯席主席林李婉冰成功游說「饒宗頤學術館之友」主席孫少文捐出饒老墨寶作慈善拍賣。林太話，鄰舍輔導會過去為唔少自閉症人士提供支援服務，好有意義，希望晚宴為該會籌募更多經費，為自閉症患者送上更多關懷。
王英偉夫婦（左二及一）捐款買枱支持細佬王英明（右二），林李婉冰（左三）及籌委會委員文蘇倩怡（右三）出面招呼，右一為王英明太太。
李三元（中）細仔李仲怡（右）成個人弗晒，左為李家大仔李曠怡。
曾繁光（中）獲太太（右）及囡囡曾名翠（左）到場打氣。
呢一晚，藝術發展局主席王英偉（Wilfred）同太太亦拍拖去支持，原來Wilfred細佬王英明係該會執委兼當晚籌委會主席。Wilfred話，今年係佢間公司慶祝成立七十五周年，與其使錢慶祝不如捐錢做善事喎！佢出力一為善事，亦為親情，又預告公司稍後會再捐款，教育及藝術等範疇都喺考慮之列。
曾繁光同囡囡似餅印
前東華三院主席李三元都有買枱支持，仲捐出六位數字做善事，李家大公子李曠怡及細仔李仲怡亦齊現身。見李仲怡激瘦咗兩個碼，原來佢愛上健身，每日唔舉過勁量級啞鈴就唔安樂。日子有功，短短一年時間就練出六舊腹肌。佢話嚟緊將會參加全球CrossFit混合健身訓練競賽，成績突出嘅話，有望代表香港競逐喺首爾舉行嘅總決賽。佢仲話，健身帶畀港人更多正能量喎！
精神科醫生曾繁光都以鄰舍輔導會主席身份滿場飛招呼賓客，佢嘅女兒曾名翠（Michelle）都嚟打氣，Michelle外貌同爸爸成個餅印咁，連興趣都一樣，佢依家喺中文大學醫學院讀緊四年級。
