設計圖片及對白
標準工時會否推行仲未有定論，但靠公帑營運嘅醫院管理局轄下支援職系員工已經落實咗，每周工時計埋飯鐘都只係四十四小時，公務員事務局早前都急急腳郁手檢討第一標準薪級員工嘅工時。大半年過去，七千五百個第一標準薪級員工之中，原來只得四十人可減工時，包括理髮師同爆炸品倉務員呢啲成個職系只得一個位嘅員工。局長鄧國威呢場大龍鳳，真係搞笑多過實際。
檢討大龍鳳受惠者少
公務員事務局尋日向立法會提交研究結果，大家先發現只得四十人可以減工時，其中仲有一啲職系只得一個人嘅，譬如理髮師，同埋相信係「花王」嘅園務工人，另有兩名爆炸品倉務員，以及三十六個物料供應服務員受惠。其餘逾七千個一級、二級工人等就一律維持現狀。當局解釋，原本有一千五百人符合減工時嘅條件，但由於同一職系內部分員工可以減，部分唔可以，為貫徹「相同職系，相同規定工作時數」嘅原則，決定犧牲為數最多嘅一級、二級工人，率先處理得一、兩個人嘅職系。咁可唔可以話係多人嘅唔減，少人嘅減咗都冇所謂呢﹖
點都好，鄧國威等花咁多時間搞場大龍鳳，受惠者卻少得可憐，政府有幾大決心推行標準工時，有眼睇喇！
第一手消息請下載on.cc東網
