政壇：政府大公關要做聲帶運動
新任新聞處處長聶德權（Patrick）係政府大公關，踏入馬年冇耐，Patrick卻要開始睇言語治療師，好似小朋友咁學習點樣發聲講嘢！Patrick解釋，農曆新年時佢患感冒，一路感冒未清令到聲音低沉，睇完耳鼻喉科後，發現佢嘅聲帶生繭，幸好唔係息肉，無需做手術。專科醫生建議佢為聲帶周邊嘅肌肉做多啲運動。
聶德權自爆要重新學習點樣發聲。（資料圖片）
聲帶點樣做運動？真係考起人。Patrick唔敢怠慢，即刻搵資料了解聲帶發聲理論，同時開始睇言語治療師練習聲帶周邊嘅肌肉，包括學習小朋友發聲嘅方法。不過講到尾，醫生交代話最好都係講少啲嘢喇！
同馮煒光分工明細
醫生嘅說話一定要聽，Patrick最近真係少說話，多做事。不過最近佢陪特首到北京出席全國人大開幕式，反而唔見新聞統籌專員馮煒光，即刻惹來外界揣測。
Patrick解畫話，佢同馮煒光已就陪同特首外訪有晒分工，如果其中一人陪特首出訪，另一個人就會留守香港喎！唔知Patrick呢個解釋，能否釋除外界疑慮呢？
