美聯集團正值多事之秋，繼兵變事件後，持有美聯百分之七點三一股權的基金Apex Benchmark早前忽然搵咗美聯創辦人之一的馮銳森做Apex策略顧問，喺○○年馮銳森同主席黃建業意見不合而離開，今次有新職，會唔會好戲在後頭呢？

Apex基金代表長繆宏邦話，一直以來持有美聯作長線投資，係因為睇好呢間公司未來發展，參考國外經驗，唔少主導型基金公司會提供意見改善目標公司嘅運作，所以今次就邀請到業界老行尊馮生加入，一來佢係美聯創辦人之一，二來佢當年培訓唔少地產代理，包括自己初入行，亦係跟佢學做工商舖代理。

馮銳森喺七十年代，同黃建業一齊創辦美聯物業，九五年美聯集團上市時，馮銳森就做副主席兼董事總經理。不過，佢喺○○年離開美聯，同其他美聯「舊將」成立必富利，專做商業物業代理。

第一手消息請下載on.cc東網iPhone/iPad/Android/Windows Phone Apps