政壇：中西區會開會唔再甩轆
中西區區議會公民教育工作小組上周舉行會議，建制派同白鴿黨許智峰因係咪開放會議爭拗，最後搞到報警事件。尋日小組開會，就餘下兩項涉及推廣《基本法》嘅活動撥款申請進行討論，在場建制派議員打醒十二分精神，其中主持會議嘅李志恒一改上次表現「甩轆」嘅樣，一開始就義正詞嚴讀出中西區區議會會議常規，包括其中一條規定區會大會及委員會會議要公開，但呢個規定唔適用於工作小組。
李志恒（右）今次做足功課先主持會議，令會議再冇出現「甩轆」場面。
許智峰就挑機提出五項臨時討論議程，包括小組會議開放予公眾及傳媒安排等，建制派以區會秘書處喺會議前個多小時先收到為由，以五票反對兩票贊成，否決要討論以上臨時議程。
工作小組其後開始審議餘下推廣《基本法》嘅活動撥款，李志恒等建制派再同許智峰針鋒相對，最後喺少數服從多數下，工作小組決定不會重審任何申請。
