政壇：唐創時送女越洋讀書
香港教育問題多多，但負責教育政策及運作嘅官員或負責人就成日死撐，可惜成日畀人踢爆講一套、做一套，好似啲高官仔女大都送去外國讀書，最新一個例子係香港考試及評核局秘書長唐創時，主管公開考試運作嘅佢原來舊年已送咗囡囡去美國升大學，唐創時解釋，囡囡好有主見，喜歡美國嘅大學着重博雅教育喎，所以舊年連本地大學嘅派位機制（JUPAS）都唔參加，直接鎖定美國嘅大學升學。講到尾，咪又係外國嘅月亮特別圓！
設計圖片及對白
話冇干涉讀書安排
唐創時尋日出席傳媒午宴時，提到去年考文憑試嘅女兒，佢話當時女兒應考，為咗避免利益衝突，或者產生不必要嘅誤會，佢刻意避嫌，特登唔處理同考試有關嘅嘢。公開試對學生升學有好大影響，唔想被人指摘瓜田李下，惟有嚴謹啲喇。
咁作為第二屆文憑試考生嘅唐家囡囡依家點呢﹖唐創時話，佢冇干涉女兒讀書嘅事，事關呢個讀拔萃女書院嘅囡囡相當有主見，喺校內聽師姐講美國好注重博雅教育，加上女兒又係修讀中國文學及英國文學等科目，對文科亦較有興趣，所以二話不說就決定去美國讀書。
唐創時仲話，女兒本來報咗JUPAS，後來亦因為聽老師講，下定決心就唔想霸住個位，最終連JUPAS都QUIT埋。
唐創時仲話，過去一年喺美國讀社會科學嘅囡囡，第二年先會揀主修科目，聽講女兒鍾情新聞系喎。嘩，在座新聞界講笑話怕唔怕遇到人身安全問題o架？唐創時就表示言之尚早，仲好淡定咁話，讀邊科唔代表一定要做嗰瓣，而且佢亦唔覺得新聞行業特別危險，最緊要都係尊重個女嘅興趣！
