SUN搞作：少膽虫手記：鬼屋
「少膽虫，今晚去深井食燒鵝好唔好？」淫賤黎垂詢少膽虫，少膽虫取出兩個頭盔，一手戴在自己頭上，一手呈上淫賤黎。「吓？雖然我哋壹全霉員工巴士成日炒，但你都唔使咁啩？定係你諗住坐『烈火戰車』去？」淫賤黎問。
「非也非也！」拜閱讀正義傳媒所賜，少膽虫知道深井鬧鬼，於是話：「只不過深井咁西，正所謂西方極樂，嗰頭陰氣積聚，腦細你流年不利，安全啲好！」唔好以為淫賤黎係教徒就唔信，佢即時嚇得頭盔落地，然後又即刻戴上話：「咁……咁行啦！」
月黑風高，隱約聽見幾聲狼嚎，少膽虫與淫賤黎喺路上心寒到打冷震。「乜啲燒鵝行晒上山咩？」淫賤黎質問睇住地圖嘅少膽虫，少膽虫就算蕩失路都只能夠話：「就到就到……哎呀！腦細唔好打我！」淫賤黎一聽已說不出話，少膽虫再求饒：「唔好掟我呀！定係腦細你用頭槌頂我？」淫賤黎「哇」聲大叫，邊走佬邊話：「我無呀！有鬼呀！」話音剛落，一陣石雨忽襲來！
「救命呀！掟佢好啦，放過我啦！」淫賤黎連滾帶爬，突然眼前一黑，龐然大物攔於路前。「肥豪？你做乜瞓喺度？」少膽虫從後趕上見到，極為詫異。肥豪惟有供出：「啱啱壹全霉工會話無晒彈藥，先至掟我出嚟咋……」
「哼！呢個世界仲有咩鬼屋吖！」淫賤黎聽後，扶正頭盔話：「壹全霉大樓仲猛啦……」
