城中鏡：向幼園請假遊台 阿Ben畀囡囡窒
北京開兩會，立法會亦休息兩星期。建制派議員陳恒鑌（Ben）就趁住呢個機會同老婆帶埋讀幼稚園嘅囡囡去台灣清境玩咗四日，為咗可同囡囡一齊去旅行，阿Ben竟然「怪獸家長」上身幫囡囡請假，但囡囡竟然義正辭嚴咁同爸爸講話覺得請假唔多好，搞到阿Ben面懵懵。
陳恒鑌同囡囡去台灣清境旅行，順便考察當地接待旅客嘅能力。（受訪者提供）
阿Ben喺台灣清境入住當地民宿，亦收集當地居民意見，問佢哋介唔介意咁多大陸旅客到訪？點知當地居民話一啲都唔介意，因為大陸旅客會幫襯當地食肆同店舖，變相刺激當地經濟。
呢一行令阿Ben多咗唔少諗法，佢慨嘆香港淨係得金舖同化妝品店，太少地道小店，令城市面貌愈來愈單一兼乏味，佢話已經同黨友何俊賢去信立法會食物安全及環境衞生事務委員會，要求委員會考慮去台灣考察當地漁農業同旅遊政策，希望本港可以考慮修改法例，等漁農業從業員兼職從事旅遊工作喎。
