城中鏡：楊天命藏酒唔賣
名酒有價，保良局日前舉辦「名酒慈善晚宴」，城中熱愛品酒嘅名人歡聚一堂。主席鄭錦鐘（Eric）找來法國頂級莊園訂製嘅「十二生肖」及「五行系列」佳釀作拍賣，由於呢兩款酒全港獨有，名人爭相競投，呢晚酒宴籌得約三百六十萬港元，善款將用於「特殊兒童發展基金」，為低收入家庭嘅特殊兒童盡早提供訓練及支援，又會資助「助醫計劃」，為長者等提供免費普通科門診服務。
楊天命嘅藏酒多達數千支，部分喺短短幾年間升值一倍。
名酒飄香，梁智仁（左三）都現身湊熱鬧，鄭錦鐘夫婦（右三及右二）、總理林潞（右一）、馬清楠（左二）及黃偉傑（左一）熱情招待。
陳細潔捐出1976年Domaine de la Romanee Conti La Tache，支持善舉。
梁安琪陳細潔捐同款酒
為咗配合兩款佳釀主題，大會仲請來玄學家楊天命分享五行之大自然風水命理，原來楊師傅除咗卜卦了得，投資紅酒都有一手。楊師傅話，過去幾年一直收藏頂級紅酒，數量多到連自己都唔記得，部分儲存喺英國酒庫，就算升值一倍都唔會賣，因為佢唔等錢使喎。講到馬年經濟，楊師傅預測今年天災、人禍、動亂特別多，特別係鐵路、隧道容易發生意外。講到去年沉靜嘅股市，今年將有虛火，易大上大落，佢話今年係儲錢年，有閒錢都唔好亂投資。
講到呢晚「名酒慈善晚宴」，靚酒多不勝數，除咗Eric推介嘅兩款紅酒外，總理林潞、黃偉傑及馬清楠亦幫手搜羅世界各地稀有佳釀，現場設有「品酒區」任飲，氣氛熱鬧。副主席梁安琪捐出一支2004年Domaine de la Romanee Conti La Tache，咁蹺另一副主席陳細潔都捐出同一款紅酒，不過係1976年嘅陳年佳釀，非常搶手。
醫管局主席梁智仁都有到場湊熱鬧，佢話收藏紅酒貴精不貴多，已珍藏幾百支極品佳釀喺英國。
