立法會政黨之間一向有明爭暗鬥，民主黨立法會議員何俊仁自從喺財政預算案公布期間，瀏覽網頁睇模特兒水着艷照後，被冠以「AV仁」稱號，佢教壞細路，亦被批評枉為立法會議員，更成為團體示威請願嘅熱門人物，繼「正義聯盟」召集人李偲嫣送珍藏版o靚模寫真集畀AV仁返屋企欣賞外，建制派議員鍾樹根同何俊賢尋日就趁立法會開會發言，聯手寸爆AV仁。

設計圖片及對白

話說立法會資訊科技及廣播事務委員會尋日開會，議員討論議程內容時，鍾樹根先提質疑，跟住佢覆述黨友何俊賢發言，點知講歪咗音，將何俊賢講咗何俊「仁」，事後佢笑笑口澄清，自己講緊嘅同事係「好專心嗰個」，跟住何俊賢亦好配合，即時拿起自己部平板電腦作狀係咁掃。佢哋兩個人一個出口、一個出手，雖然冇提AV仁，但寸AV仁開會時睇艷照嘅意圖同意思，就係人都知。

議員喺議會攻訐係慣常事，但起碼都有趁機或基於相關嘅事，好似今次咁自導自演，踩人都顯得生硬，唔驚畀人揶揄小學雞o架？點都好，AV仁犯錯在前，畀人笑都冇符！

第一手消息請下載on.cc東網iPhone/iPad/Android/Windows Phone Apps